ثلاث الاثافي

ومدلّهن روحي على راس مدهال
على طويل اشهاق وابو العوافي (1)

لن شفت من بعض الخلايق غثا بال
سج القدم وابعد عن اللي مجافي

بعض العرب شوفه ولا اقشر الفال
وبعض العرب شوفه يجيب العوافي

الله خلق دنيا لها جال عن جال
وعن شوفة الحقران قدك امتعافي

لا شفتها ضاقت ولا شفت مدخال
اجنح لسلمك قبل عض الاشافي

وان ضاق بك منزال ياسعك منزال
لو ان منزالك بروس الشعافي

محد ٍ نزل في بير ما حوله احبال
ولحد ٍ يشوف الغيم ويقول صافي

قالوا العرب من وسّع الباب جمّال
وقالوا العرب من يزرع الصبخ هافي

وقالوا معاك ريال تسوالك ريال
وان كان عندك الف تسوى ألآفي

وانا اقول الطيب في كل الاحوال
طيب الفتى لا طاب راسه وعافي

الطيب عسر وما يوفّيه رجّال
ولا تغنمه اهل القلوب الضعافي

الطيب ما هو بس دله وفنجال
الطيب مدّك بالسنين العجافي

كم من رجل يسوى ولا مية رجال
وكم من رجال وما عليهم حسافي

بعض العرب جنّب عن الطيب وانجال
حتى لو ان بواجبه ما يوافي

والمال لو يفني يجي غيره اموال
الا الشرف لا راح راح العفافي

الله ليحيجك الى بعض الاشكال
اللي لهم مجلس عن الطيب طافي

قلاّبة النيات قطاّعة اوصال
ومهايط ٍ ع الناس ماهوب خافي

دور بدلهم والعوض جاك بقبال
ابعد عن الحقران والخير لافي

دور على رجال له قدر واجلال
ذيب ٍ الى مال الزمن ما يخافي

مالك ومال اللي بلا قيد وعقال
لا صار مايشفي ولاهوب شافي

لاشاف سمر إلثام ميمون ع الشال
ولا شاف ضيفه لآخر الدرب طافي

والمغربيه بدل الثوب سروال
ثم نام بدري واقبل الليل حافي

واحفظ شرف نفسك عن القيل والقال
واترك رجال ٍ بالمجالس خفافي

وعشان ما تنقد ع بوزيد الازوال
قام وتمنى له رقاب الزرافي

الحظ صدفه والصدف كذب وآمال
وكم واحد ٍ يركض على حظ مافي

اقنع قناعه الشمس ميردها اظلال
وللبيت ربه رب عبد المنافي

والادمي مصيره يكون رحال
الموت ما يعطيك وقت ٍ اضافي

الموت مره والبعث مابه اجدال
ورزقك ع الله لا تذل وتخافي

انودع الايام ودموع الاطفال
وتطول رحلات الحزن والمنافي

ياما سبرت الشوف مع اشهب اللآل
وشفت السراب المهمهي والفيافي

العمر يفني صاحبه طال ما طال
الظل مهما مد صار امتقافي

والوقت هذا يطبخ الفاس والغال
ويسقيك مٌّر ٍ عقب شرب المصافي

دنيا دنيه شيبّت روس الجبال
لو زخرفتلك تاخذك من خلافي

يعيش فيها اللي كذوب ٍ وحيّال
لاجيب طريا العيب هزّ الكتافي

وصارت على الرجال هم ٍ وغربال
شاف الشقى منها وشاف التجافي

من خلقة الدنيا والعيون تهتال
بقعه تصكك في ثلاث الاثافي

عجوز شمطا تخرب بيوت العيال
لا مشّطت وجه السعد بالسوافي

اليا أضحكتلك صكّة الوجه تختال
واليا بكت حدّت عليك الشلافي

ياما هفت اقوام وجموع واجيال
وثلاث ارباع البشر بختلافي

جاك الصباح بحال والليل في حال
ولى انت جاهل وش نهات المطافي

تاخذك بقعه ثم ترميك الاهوال
وتجيب فيك العيد وانتا اسنافي

اما ترزك فوق ولى مع الجال
وتمد رجلك قد هاك اللحافي

ياما انفتن شامان في حبة الخال
وعوّد على وجهه يحد الرهافي

ما كل من يغزي ابو زيد ينقال
ياما غزا رجال ثم عاد حافي

والحِق ما يكفيك عن شيل الاثقال
والثور في كبره عن الرشد غافي

والحر لولا الجوع ماهوب قتّال
والحر لو ياعد على طول يافي

ترى الرجال اشكال اجواد وانذال
فيهم ردي وفيهم اللي يعافي

أصدق مثل من تسبق اقواله افعال
واكذب مثل يا حر ليه انت وافي

يالله تهدينا الى طيب الاعمال
وتستر على عبد ٍ على الطيب ضافي

عند الضروره اكتب الشعر بالحال
وآطيّب جروحي بخير القوافي

لاخير في شعر ٍ اذا صاحبه مال
والشعر حكمه دام هالقلب دافي

لا ضاق بك منزال ياسعك منزال
وبعدك عن الحقران لو شبر كافي

شعر عناد الرواد

(1) طويل شهاق وابو العوافي جبيلين معروفين بالاردن

وسيع الطعنه
صح لسانك وفكرك ابيات فيها من الحكم الشي الكثير

لاعدمناك تحياتي لك

أخوي سعد
من قرائتي للأبيات الأولى
عرفت أن اللي كاتب هذه القصيدة إسمه سعد
لأني سبق وقرأت لك ..
أنت شاعر جزل وأبياتك جزله وأسلوبك الشعري
مميز ولك بصمة خاصة تميزك ليست إلا لقلمك.
دمت على الإبداع ياأخي وأهلا وسهلا بك
وتقبل تحياتي

صح لسان قايلها وسلمت ايدين ناقلها

وانا اقول الطيب في كل الاحوال
طيب الفتى لا طاب راسه وعافي

الطيب عسر وما يوفّيه رجّال
ولا تغنمه اهل القلوب الضعافي

سح لسانك ولسان قايلها

ارجو التوظيح هل القصيده لعناد الرواد ولاسعد لان احد الردود يثني على سعد ويقول عرفت اسلوبك؟
المهم القصيده نادره اي ان كان شاعرها لاكن حفظ حقوق الشاعر واجب
راجيا من الاعظاء الكرام توضيح الردود وعدم الخلط بين الاسماء حتى لاتختلط الامور على القارء

لكم تحياتي

لا هنتم على التفاعل مع النص

القصيده للرواد

الثناء على القصيدة وصاحبها وليس على سعد بارك الله فيك. والموضوع ومافيه إني أخطأت في كتابة الإسم وليس خلط مثل ماتقول. والعذر لأخوي عناد وحقوق الشاعر محفوظة مهوب أنا ولا إنت إللي نضيّعها.

المشاركة الأصلية كتبت بواسطة هداج

الثناء على القصيدة وصاحبها وليس على سعد بارك الله فيك. والموضوع ومافيه إني أخطأت في كتابة الإسم وليس خلط مثل ماتقول. والعذر لأخوي عناد وحقوق الشاعر محفوظة مهوب أنا ولا إنت إللي نضيّعها.

مرحبا هداج لم يكن القصد من كلمة (خلط) الاسائه ونعم انا ونت مانضيع حقوق الشعراء ارجو السموحه اذا حصل خطء مني ودمت على خير

ما قصرتم

مروركم شرف لما كُتب

صح لسانك وسلم بنانك
قصيده تحلق عاليا

لا خلا ولا عدم

عطرتم متصفحي بروعة حضوركم

يسعدهم ربي

لا هنتوا انتم الفخر بعينه