الصمــت

[poem=font=",7,darkblue,bold,normal" bkcolor="transparent" bkimage="http://www.alhowaitat.net/mwaextraedit2/backgrounds/93.gif" border="solid,4,black" type=1 line=1 align=center use=ex num="0,black""]


قالوا علامك صامت وقلت يانـاس =كثر الكلام يقـل لاجلـه مقامـي

الصمت حكمه والحكي مصدر إفلاس =ولقيت في صمتـي يزيـد احترامـي

الصمت له معنى وله ذوق وإحساس =مركب نجاتك فـي بحـور الظلامـي

ترى الرجل صوره من الراس للساس =ثـم يتبيـن جوهـره بالكـلامـي

إما نطق في كلمـة ترفـع الـرأس = تضفي على شكله جديد الاسامـي

وإلاّ يعوّد معدنـه معـدن انحـاس =يرميه سهمه بعـد ماكـان رامـي

لا صار عندك من ثمينـات الألمـاس =خله بصدرك ليـن وقـت التمامـي

أخاف يطلعلك من النـاس بـلاس =وإلا سفيـه مـا يـرد السـلامـي

الله خلق خلقه على عـدة أجنـاس = وكلـن يسوقـه مذهبـه للأمامـي

والله خلق بالطير قمـري وقرنـاس =ووقت الهدد ما ينغـزى بالحمامـي

لا جال في صدرك من الهم هوجـاس =وعينـك يحاربهـا لذيـذ المنامـي

ونفسك عليله والفكر صار محتـاس =اترك طمان القـاع وارق السنامـي

عليك بالعالـي ليـا هـب نسنـاس =يبري الجـروح الخافيـه والعظامـي

وخلك لربعك دايم الـدوم نبـراس =وخص القريب وخص ولد العمامـي

خلك لهم في داجي الليـل مقبـاس =وللصاحب أصدق من حقوق الغمامي

ربعك ذراك ليا لحق راسـك البـاس =قدم لهم شربك ولو كنـت ضامـي

وخلك لثوب الطيب والعـز لبـاس =واتـرك دروبٍ تنتهـي بالحرامـي

وفعل الجميل وواجب الضيف نوماس =ومن لا نفع بالضيق نفعـه عدامـي

بيت الكريم أبوابـه بـدون حـرّاس =وبيت البخيل يعـد مثـل الهدامـي

كلٍ بهـا الدنيـا نصيبـه بمقيـاس =ياخـذ نصيبـه لوجفـوه الأنامـي[/poem]