يا طير هديتك مع الصقاره
ودي اشوف اكفوفك الجساره
طيري لساني يا رجال المجلس
مالي ومال العالم الهذاره
قد قال ابو زيد الهلالي قبلي
ليت الرقاب اطول من الصناره
عشان لا تمسك علي الكلمه
وتصيدني هالعالم المكاره
يا صاحبي والهرج مثل العذره
إتعب عليه ولا تفض ابكاره
إيهب يا وجه ٍ يدور الزله
اللي عيونه في محارم جاره
عيب ٍ على الرجال يهدم حظه
من شق ستر الناس شقوا ستاره
الهرج بلوى والحكاوي بلوى
عن اللغى كل ٍ يعسف امهاره
إحد ٍ بهالمجلس عريض المنكب
اليا نشدته ما يجيب اخباره
واحد ٍ سواليفه تغث السامع
واليا هرج تلقاه فك ازراره
اطلق حصانه بين هذا وهذا
الحلق مدفع وان رطن كساره
قلبه مريض ولا يعرف الشيمه
دفع البلا من عينه الغداره
الله واكبر يالقلوب السوده
آظنها نصف القلوب احجاره
عن مثل هذي الناس ودك تبعد
وتقول صبر الروح يا صباره
احد ٍ يجيب القول وسط المرمى
يسدده تسديدة الطياره
واحد ٍ يجيب القول فوق المرمى
جاه الحكم مع نفخة الصفاره
الله عطانا عقل فيه انفكر
وكل ٍ قبل يهرج يقيس اشباره
ملايكه عالمنكبين اتكتب
والآدمي تكتب عليه اوزاره
أبرأ الى ربي براءة يوسف
وأبرأ انا من نفسي الاماره
المجلس الطيب يطيب ناسه
ومن لا درى بالكار يطفي ناره
في مجلس ٍ فيه الرجال اتهلي
وتنهج عليه اضيوفه الخطاره
المجلس اليا جيت ودي حاجه
اجلس واسامر ناره السماره
من دون حش ولا لغى ونقيلي
ومن دون قذف ونبزة المعياره
ناس ٍ مجالسهم ذنوب وفتنه
نهاشة الطرقي مع المراره
ناس ٍ مجالسهم مدارس فطنه
ولا هي من اللي تنطفا انواره
مجلس عمار مشرعات ابوابه
ترتاح له لا من وصلت اسواره
على هلا واهلين وانطح فالك
وفنجال اشقر زايد ٍ فبهاره
واليوم صارت هالمجالس لعبه
امباريات وفيلم باب الحاره
العود يسكت والعيال تسولف
كل ٍ على ما راد دق الطاره
لا شك عشب الدار مابه حكمه
راحت عليه المزنه المدراره
وانا بخصت الناس يهل العليا
ولقيت طلع الحر عند الشاره
سقف ائتمان الهرج انك تلزم
حدود خط الرجعه ومشواره
ياليت يطلع بالمجالس فاهم
يغسل على يديه قبل اعذاره
وياليت لقمان الحكيم يوصي
اصغار هذا الجيل هم اكباره
واللي جهل بعض النقاط بشعري
باصرفه وآشوف له دباره
يعني بجيه بنص يفهم شرحه
وآطلع اللولو من المحاره
وان كان ما به ناس تعشق اسمي
تحرم علي عيشتي يا ساره
ودي اثبت للرعيل الاول
بصمة وفا بشعاري المختاره
كل القصايد تنتهي في لحظه
ويبكي عليك طويق يا سنجاره
الصناره
العرض العادي
