احنا بشر ما فالبشر شخص كامل
وكل واحد ٍ منا به انقوص وعيوب
صحيح في بعض المواقف انجامل
على حساب الطبع ونقول ماجوب
هو ما ذبحنا غير بط الدمامل
كل شي ع الرجال لا شك محسوب
لولا خلف ما ينحرج وجه زامل
لقنه درس ٍ عن تلاقيفه ايتوب
والمشكله حتى حقوق الارامل
انعذربه والحق ما فيه عذروب
كم شاش رجل ٍ مير ماهوب صامل
وكم واحد ٍ يجذبك ما يملي الثوب
وصحيح تنقصنا فنون التعامل
تلقى السبب ياخوك في ضعف الاسلوب
ياكثر ناس ٍ يكسرون الانامل
وياكثر ناس ٍ طيبة نفس وقلوب
الطيب عسر ٍ والردى جين خامل
تلقى الرجل في صوب والمرجله صوب
المشكله ترجع لعدة عوامل
منها الوراثه تدخل الدم واتذوب
لو كل من يطوي شراع المحامل
لضاعت الرحله ولاشقت ادروب
فرق الوكارا عن قياس الكوامل
بعد الجدي لسهيل فيذا التلسكوب
ولكل سياره بريك وفرامل
والشاه لو تذبح تعلق بعرقوب
ما فالبشر شخص كامل
العرض الشجري