قارب نجاه

الشعر من ماضي زمانه مثل مرعض في رويل
هو كفّة الميزان وهم دايم شيوخ القافله

الشعر وزن وقاف له معنى وإحساس ٍ جميل
اما الحشو كل ٍ يجيده ومن يبيه ايغافله

الشعر بين اثنين يا إنّه عسل يا حنظليل
احد ٍ يجيبه عذب واحد ٍ بالمراره كافله

واجزل شعر صدق المشاعر واعذب الشعر الجزيل
واردى شعر ما كررته اهل القلوب الغافله

لكل شاعر ما عليكم زووود بصمات ودليل
ولكل راعي فضل فضله بين فرض ونافله

وانا بعد شاعر رقم واحد من الوزن الثقيل
لاجيت للساحه قسم لمسك زمام الحافله

مافي أحد يقدر يقول ان التميز مستحيل
ومافي احد يقدر يسابق ركب جيل ٍ طافله

امّا انا قارب نجاه أجنح الى الشعر الفضيل
ومن دون ذكر اسماء يا كثر النجوم الآفله

إمن البديهي أحشد الهمّه من ارقاب النخيل
وابني من احطامي قمم ما تنحدر للسافله

به شاعر ٍ يهوى الجزاله لو كتب شعر ٍ قليل
وبه شاعر ٍ ما جاب له معنى جزل او ضافله

شعر ٍ بدون احساس / مايروي بعد شق الصميل
وحس ٍ بدون احساس صادق من يجي ؟ ويحافله؟

وشلون لو نفسي تكشّف متسعها للاصيل
ما شفت لحظه للغروب إلّا بوقتي جافله

هذا اجتهادي واجتهادي قد يصيب وقد يميل
ميهمني نبح الكلاب اللي بذيل القافله