يخرب بيته

احد ٍ تشوفه تفرح انك لقيته
واحد ٍ تمنى ما تشوفه من الباب

احد ٍ تحبه في ثواني هويته
لا شفت له موقف يوردك الاعجاب

واحد ٍ يبيعك رغم انك شريته
يبيع هالخوه على اتفه اسباب

احد ٍ على الشارب اذا مانخيته
واحد ٍ يقول ابشر وهو بارد اعصاب

واحد ٍ يغيب اسنين لا ما نسيته
سبحان ربي له معزه وترحاب

واحد ٍ يغض الطرف يومك سليته
واحد ٍ يداوي غيبتك لوم واعتاب

واحد ٍ تجيه اظروف لكنّ ليته
يجيب عذره بس ماهوب كذاب

كذا على النيه وطيّب فديته
بينه وبين الربع مايدخل حساب

واحد ٍ توذى منه حيه وميته
ما عنده الا عضة اليد بالناب

واحد ٍ صعيب وكان بسلوب جيته
تقضي لزومك كن ما دونك احجاب

واحد ٍ قريب وما يدخلك بيته
واحد ٍ يعوضك عن ردى كل الاقراب

واحد ٍ يحارش والبلا ما شنيته
خله بحاله يفتشل عند الاجناب

الذيب يكفي عن ملاقاه صيته
ولى الحثاله عايشه عيشة اكلاب

الحر يرقابك اذا ما رقيته
وابو حقب يطمن الى شاف مرقاب

اليا جهلت الطير غصب ٍ شويته
وتدور الشرهات بوجيه الازلاب

احد ٍ يجي طيبه اذا ما ثنيته
واحد ٍ يجيه الطيب من جين الانجاب

واحد ٍ بهالرشاش كانك صليته
مايمون ع الحرمه وللثور حلاًب

شوفه غثا بال ٍ اذا ما لفيته
وقربه شناعه يطبخ الفاس مرتاب

عمله لها وجهين يا خرب بيته
نذل ٍ عديم احساس ميعرف الاآداب

حقد الجمل داخل عيونه قريته
وشلون لو هو يكتب الحقد بكتاب

ارفع مقامه بالشعر لا هجيته
ما يشبع اعيونه سوى حفنة اتراب

يعجبك في جسمه اذا ما رأيته
لو هو يصلي يم قبله ومحراب

ماني بثق في لحيته لا دعيته
ولا غرني ملبوسه وقصر الاثياب

ان كانه اقفى لا حشا مشتهيته
ولانيب ناشد عنه من بين الاصحاب

كفي لكذب مصافحه قد كويته
مانيب حاله لو معه شلفة اذياب

ينط في وجهك اذا ما طريته
اغراب بين إيهب يا وجه الغراب

قلبي نظيف وحسن ظني مليته
ما كنت اعرف ان لدغته لدغة الداب

يطب ع اكتافك اذا محتويته
ينثر ملح ع الجرح ويقول لك طاب

يبشّ في وجهك اذا مشتكيته
وعلى نقاط الضعف تلقاه لعّاب

مثله وغيره من حياتي لغيته
وارتحت راحه يوم سديت هالباب

اما وطاك السيل ولى وطيته
هذا اول يومها عيشة الغاب

سلم على سعدون اليا لفيته
قله ترى فيني من حجاب وعقاب

والسيف اقسم في جفيره طويته
شوف اقلمي بالجيب ماعرف الارهاب

لكن تبطي تهدم اللي بينته
انا الى ما صكت الحلق ما هاب

اللي إيحشمني دم قلبي عطيته
واللي يبي ذلي لهلحين منجاب

لو هو يموت من العطش ماسقيته
النيص لحمه نيّ واحرابه احراب