ما كل من يركب على الخيل خيال

بسم الله الرحمن الرحيم

أحبائي

السلام عليكم ورحمة الله وبركاته

هذه القصيدة راقت لي فنقلتها لكم

عسى أن تروق لكم

000000000

ما كل من يركب على الخيل خيـال
ولا كل خيل تعجبـك هـي أصيلـه
ولا كل من يعجبك هرجـه برجـال
بعض العرب ملسون وايده بخيلـه
الكل يلبس ثوب وشمـاغ وعقـال
وعند اللزوم افعالهـم هـي قليلـه
الرجل تثبت لـه أقاويـل بافعـال
لاقـال شـئ ونفـذه هـو دليلـه
والرجل لاشفته مع القيـل والقـال
ابعد عنـه هـذا صفاتـه عليلـه
والكذب خله عنك مافاد لـو طـال
قول الصدق ياصاح غنـم وجميلـه
وخلك شجاع وذي صفات للابطـال
اللي كما سيـوف تبـارق سليلـه
واللي شراك اشريه لو كان بالمـال
خلك معـه وان مـال دور بديلـه
واصبر ترى الدنيا تبدل بها أحوال
وما كل شيء صافي تشوفه تجي له
وبعد الكدر تشرب صفا عذب وزلال
هذا الزمن فيـه استقامـة وميلـه
وصاحب خليل لو جفا الوقت ما مال
ترى الرجل يعرف بقيمـة خليلـه
واقفل على سرك بكتمـان واقفـال
بعض العرب يسمع وينوي بحيلـه
وخلك أميـن إذا توليـت الأعمـال
من خان في يوم الحشر يا حليلـة
خل التواضع فيك واضح بالافعـال
ترى الكبـر يـردي بيـوم وليلـه
ولا تحسد اللي عنده أموال وعيـال
وش ينفعك لو كان حسدك يزيلـه
ولا تـزور تقلـب الزيـن بطـال
الله علـيـم بالنـوايـا الدخيـلـه
وخلك رزين ترى المخفه للاطفـال
واصفح عن المخطي ولو زاد قيله
واحمل همومك لو تزن وزن الاثقال
بكره تـروح وتنجلـي لـو ثقيلـه
وصل الفروض ولاتنسيك الاشغـال
محدن في الدنيا درى وش بقي لـه
وزور الاقارب للرحم كون وصـال
واياك تقطع وصالهم تراه ميله
وصلاة ربـي عـد ماهـل هلال
على النبي اللـي صفاته جليلـه

تحياتي

محمد محمود