اللوز لامنه لبس ثوب الافراح *** الناس تجي للوز من كل ديره
صوت المؤذن به مسيه ومصباح ***وغنت به الشعار واهل البصيره
الشيح والقيصوم والعطر لافاح***من كل بره عاليه مستديره
مفلى الوعول متعبه كل سباح***المحترف راعي الصواري القصيره
واهله سعوديين دركين وصحاح***اهل البيوت الواسعه والكبيره
وكله تحت ظل العلم نجني الارباح*** وجنود اخو نوره عليه وتديره
مستقبله طيب لزاير وسواح***اهل التجاره والرجال الخبيره
يغنيك عن لندن وبيروت وارتاح***واجعل فلوسك داخل ارضك ذخيره
وشيد وعمرواشتغل فيه فلاح***بيديك تجني من نعيمه وخيره
وسو الحدايق واستراحات الافراح***وازرع من الزيتون وازرع شعيره
وازرع بها نرجس وورد وتفاح***والتين والزيتون واحضر خبيره
ولاتصحي النايم ولا تصير نباح***تركض ورا من حط شيك وحضيره
وخل التعصب واقفو قلب وجناح***كل يسوي بقدرته في مسيره
وقلب يشيل الحسد ماهو بمرتاح***والعمر يفنى والليالي قصيره
وهذا ربيع الخير والشر ينزاح***ماهو ربيع اهل الوجوه الشريره
دم يسيل وذبح نسوان وصياح***ياكبرها وانا اشهد انها كبيره
ويعيش ابو متعب لنا عز وسلاح***وبحكمته خلى الكبيره صغيره
قاد السفينه واعتلى كل ملاح***واطلب من الرحمن ربي يجيره
خير ضفى واعطى مريضين وصحاح***ع الجار واللاجئ وع المستجيره
وصلاة ربي عد مابرقها لاح***على نبي الله صافي السريره
شاعر العمران:فرج بن محيسن العمراني
الثلاثاء
1434/4/2
اللوز لامنه لبس ثوب الافراح
العرض الشجري