ان ضاق بالك لا تفكر وتحتار

ان ضاق بالك لا تفكر وتحتار .....سج الخطاوي عن ضجيج المدينه

في روضة ن من حولك تفوح الازهار ..... يرتاح فيه اللي حياته حزينه

الجو هادي ما به هموم وكدار .....بعيد عن مجلس يجيب الغبينه

بعيد ما تسمع سواليف واخبار ..... وهروح ربع ن بالشنا ناقلينه

من حولك اللي لا غدا الوقت وان جار .... ما يتركونك لليال اللعينه

من شانك ايدوسو على ادروب الاخطار ....اهل الوفا واهل العقول الذهينه

ما يركعو يا كود للواحد البار ..... الغافر اللي كلنا تابعينه

ما يعرفون النم والذم والعار ..... كبيرهم لاقال هم سامعينه

وليا انتهض قرم ن لها يشعم النار ....وبريق شاي ب بحرفها واضعيه

ودلال صفر ونجرها يجهر اجهار ....والبن الاشقر لا ركدت ملحقينه

فنجالها بالكيف والطيب يندار .... لا مدها جزل العطا في يمينه

كلن يجر الهرج حكمه وتعبار .....جزل المثايل والمعاني ثمينه

لا ذعذع النسناس في وقت الاسحار ..... من فوق رجم ن بالقدم معتلينه

يطرب له الخافق بلا عود ووتار .....يغنيك عن شوف البحر والسفينه

يا دار لك في داخل القلب مقدار .....كل يوم زايد لك غلاه وحنينه

يا دار فيك تحير تعبير الاشعار .....ثراك من مبطي وفا عاشقيه




......................................................

المبدع عبدالله الخضيرات صح لساانك مليوووون