ماتشوفنا بتويتر أكثر امغردين

العمّ سام اقفى وقفّى شبابه

وطلع من البيضه لنا عمّ يا شين

يا عمنا فيروز لفّ العصابه

ازهم ورجّع مجد كسرى حمر عين

حنا ترى جيران ويمكن قرابه

ولك عندنا كلمه ولا تصير ثنتين

شط العرب والفرس ماهي طلابه

ترى الطلابه في هلابه وسهلين

ما تشوفنا بالـ (فيس) كلنا ذيابه

وما تشوفنا بتويتر اكثر مغردين

يا ونة العربان ونة ذبابه

ويا خانة أمريكا من اسنين وابنين

لو هو صلاح الدين هذا مصابه

ما كان شد سروج خيله لحطين

ما عاد يا كبش العرب من مهابه

اليوم شف روس العرب ماكله طين

والشرق الأوسط غارقن فالطلابه

رايح مع التقسيم مدري الى وين

خله مع السمبا وجدول العابه

المونديال ابرك وفيه الوضع زين

لو يدري السيسي بجوع الغلابه

ما كان حط راسه براس الملايين

ولو تغسل الاكراد غسل الجنابه

ما يطهرون الا يصيرون شعبين

ولوهي ع أبو مازن وحضرة جنابه

عزالله انها ما تحرر فلسطين

وابشرك حفتر مسوي عصابه

يدعي الى التقسيم ويقول آمين

ومدام داعش صايرة سبع غابه

لازم يسيل الدم من ايسار وايمين

وشلون ابكي الدموع اتّشابه؟

مدري انا ابكي من ؟ وابكي على مين ؟

خلّ الغرابه في زمان الغرابه

بكره , ويمكن , واصبر اشوي , والحين ,

مرات ما تنفعك كثر الصلابه

ومرات غصبن من ورى خشمك اتلين

المشكله ماهي سؤال واجابه

المشكله باللي يسموا ( مسلمين )

أخاف شيٍ ما حسبنا حسابه ؟

مقدر

أقوله

بسّ

خلوه

بعدين !